വൃശ്ചികം എന്ന മലയാള മാസത്തിന്‍റെ ഓര്‍മ്മയിലാവാം, പലരും, യാദൃച്ഛികം എന്ന പദത്തിന്‍റെ മൂന്നാമക്ഷരം 'ശ്ച' എന്നെഴുതാറുള്ളത്. 'നിശ്ചയം', 'ആശ്ചര്യം' തുടങ്ങിയ പദങ്ങളെഴുതുമ്പോഴും 'ശ്ച' യാണല്ലോ എന്നതും അതിനൊരു കാരണമാകാം.

അവിചാരിതമായി, എന്നര്‍ഥം വരുന്ന 'യദൃച്ഛയാ' എന്ന പദത്തില്‍നിന്നാണ് 'യാദൃച്ഛികം' എന്ന വാക്കുണ്ടായത്. ഈ 'ച്ഛ' ചേര്‍ന്നുവരുന്ന ഒട്ടേറെ പദങ്ങളുണ്ട്. 'പുച്ഛം' മറ്റൊരു പദം. നാനാര്‍ഥവാചിയായ പുച്ഛത്തിന് വാല്‍, അഗ്രഭാഗം, നിന്ദ, വെറുപ്പ് എന്നൊക്കെയാണര്‍ഥം. നിസ്സാരം എന്നയര്‍ഥത്തില്‍ ഏറെ ഉപയോഗിക്കാറുള്ള 'തുച്ഛം' എന്ന പദത്തിലും 'ച്ഛ' ഉണ്ട്.

(ലിപി പരിഷ്കരണത്തെത്തുടര്‍ന്ന്, 'ഛ' എന്ന അതിഖരാക്ഷരം മാത്രം ഉപയോഗിച്ചാലും മതി; 'യാദൃഛികം' എന്നിങ്ങനെ).

****

'നിന്ന്', 'നിന്നും'

പ്രയോഗ വ്യത്യാസമെന്ത്?

സര്‍വീസില്‍നിന്നും വിരമിക്കുന്ന അധ്യാപകര്‍ക്ക് യാത്രയയപ്പു നല്‍കി. കോട്ടയത്തുനിന്നും പുറപ്പെട്ട ബസ് കണ്ണൂരെത്തി - ഇത്തരം വാക്യങ്ങള്‍ നാം ശ്രദ്ധിച്ചിട്ടുണ്ട്. വ്യാകരണശുദ്ധമല്ലാത്ത ഒന്ന് ഈ വാക്യങ്ങളിലുണ്ട്.

'നിന്നും' എന്നല്ല, 'നിന്ന്' എന്നാണിവിടെ ഉപയോഗിക്കേണ്ടിയിരുന്നത്:

സര്‍വീസില്‍നിന്നു വിരമിക്കുന്ന അധ്യാപകര്‍ക്കു യാത്രയയപ്പു നല്‍കി,

കോട്ടയത്തുനിന്നു പുറപ്പെട്ട ബസ് കണ്ണൂരെത്തി- എന്നിങ്ങനെ.

ഒന്നിലേറെക്കാര്യങ്ങളെ ചേര്‍ത്തുപയോഗിക്കേണ്ട സന്ദര്‍ഭങ്ങളില്‍ മാത്രമേ 'നിന്നും' ആകാവൂ.

കപ്പലില്‍നിന്നും വിമാനത്തില്‍നിന്നും ഒരേ സമയം മിസൈലാക്രമണം നടന്നു - ഈ വാക്യം ശുദ്ധമാണ്.

കോട്ടയത്തുനിന്നും പാലായില്‍നിന്നും കണ്ണൂര്‍ക്ക് ബസ് സര്‍വീസുണ്ട് - ഈ വാക്യം ശരിതന്നെ.

(ചില സന്ദര്‍ഭങ്ങളില്‍ 'നിന്ന്' വേണ്ടാ, 'നിന്നു' മതി).

ഉദാ: ഞാന്‍ ഇവിടെനിന്നു യാത്ര തിരിച്ചപ്പോള്‍ മഴ പെയ്യുന്നുണ്ടായിരുന്നു. നെടുമ്പാശ്ശേരിയില്‍നിന്ന് യൂറോപ്യന്‍ രാജ്യങ്ങളിലേക്ക് വിമാനത്തില്‍ പോകാം)